'A SERENATA 
Bovio - Lama   
   



No, nun t'abbelí,
só' tutte amice
ca se vonno divertí...
Ognuno 'e lloro sona nu strumento,
comme si fosse...nu divertimento...
Comme se dice?
Questa qua è una "suvaré"!

Mme piglie e po' mme lasse,
po' mme lasse,
e po' mme piglie,
ma pecché?
Só' fatto na pazziella?
na pazziella
'e piccerillo,
'mmano a te?
Te spasse? E nun fa niente...
Spássate, ch'aggi''a fá?

Sstss!...Nun giá accussí...
cchiù delicato...
Nun ce avimm''a fá sentí!
Sunate zitto zitto e doce doce,
si no nce 'o perdo stu felillo 'e voce...
V'aggio pregato
ca mm'avit''a cumpatí...

Mme piglie e po' mme lasse,
po' mme lasse,
e po' mme piglie,
ma pecché?
Só' fatto na pazziella?
na pazziella
'e piccerillo,
'mmano a te?
'Nfí' a quanno nun mme stracquo,
fa' chello ca vuó' tu...

Pe' te dimustrá
quanto ti "atóro",
nun 'o ssaje che voglio fá?
I' voglio fá quacche penzata mia:
Piglio e te scanno!...Vi' che fantasía!
Tu muore e io moro,
ma 'a sentenza è chesta ccá!

Mme piglie e po' mme lasse,
po' mme lasse,
e po' mme piglie,
ma pecché?
Só' fatto na pazziella?
na pazziella
'e piccerillo,
'mmano a te?
Pe' mo siéntete 'e suone...
Dimane...mar'a te!