BELZEBU' 
Palomba - Bruni   
   



Nun ce sta nu filo 'e viento,
pare 'e fuoco tutt''a rena...
ma, stanotte, a Margellina,
che succede, gente, gè'?
Nu vasciello a vele nere,
s'avvicina chianu chiano...
'mmiez'ê tuone e 'mmiez'ê lampe,
sta sbarcanno 'nterra ccá.

- Ma chi è, ma chi è, ma chi è?!... -
'Mmiez'ê ffiamme rosse e blu...
Gente, gente, currite a vedé!...
E' arrivato Belzebù!
'E Rumane, 'e Sarracine,
'e Spagnuole e ll'Angioine,
'e Tedesche, 'e Marucchine:
ce mancave sulo tu!

Arapítele 'e pporte a Belzebù!

Fa nu passo 'e mille metre
e, cu 'a voce sója d'inferno,
mentre cadono 'e palazze,
isso allucca: - Nèh, guagliù!... -
E da 'a vocca d''o Vesuvio,
cientomila diavulille,
se ne tornano sciulianno
'ncopp''a coda 'e Belzebù...
- Ma ched è... ma ched è...ma ched è? -
Se n'è ghiuto Belzebù!

Finalmente stavota over'è:
'nziem'ê figlie 'e Belzebù,
'e Rumane, 'e Sarracine,
'e Spagnuole e ll'Angioine,
'e Tedesche, 'e Marucchine,
mo, nun 'e ttenimmo cchiù!

E 'nzerrátele 'e pporte a Belzebù!

Mm'è venuto nu suspetto
ca quaccuno s'è nascosto..
e mo, invece 'e stá a ll'inferno,
va giranno p''a cittá...
Chisà quante ce ne stanno,
assettáte 'int''e ppultrone,
chisti diavule 'mperzona,
chisti figlie 'e Belzebù...

- Viene 'a ccá, viene 'a ccá, viene 'a ccá...-
Torna ampresso, Belzebù!
Sulo tu puó' salvá 'sta cittá:
Vienatille a pigliá tu...
'E Rumane, 'e Sarracine,
'e Spagnuole e ll'Angioine,
'e Tedesche, 'e Marucchine,
e chist'ate che saje tu...

Portatille a ll'inferno, Belzebù!...