BUONGIORNO A MARIA 
E. A. Mario   
   



'Ncopp''a fenesta ca sta 'nchiusa ancora,
saglie 'o saluto mio pe' te scetá...
E tu ca saje 'a voce e ca saje ll'ora,
statte scetáta...ma nun t'affacciá:

Statte scetáta e siente
'sta voce 'e chi te penza ore e mumente..
e, albanno juorno, 'a dint'a ll'ombra vène...
vène e te torna a dí: "Te voglio bene!"

Buongiorno ammore mio, buongiorno ammore
ca nun te cagne e nun te puó' cagná...
Comm''o rilorgio, 'o core conta ll'ore...
ll'ora pe' t'addurmí...e pe' te scetá...

E tu, cuccáta, siente
'a voce 'e chi te sceta puntualmente
e, albanno juorno, dint'a ll'ombra vène...
Vène e te torna a di' ca te vò' bene!...

E po' t'adduorme e po' te sceta 'o sole...
di', che te suonne 'int'a sti suonne tu?
Che t'hanno miso 'ncore sti pparole
che 'a tantu tiempo nun sentive cchiù?

Statte cuccáta e siente:
t''e ddice chi te penza eternamente
e, albanno juorno, dint'a ll'ombra vène...
'E ttre parole só': "Te voglio bene"!